الراحلين .. للشاعر سالم حمد الملعبي

عن كل حاجه جابها الوقت مشكور
عشت و دفنت احلامي اللي توفّت

غصن الحنان اللي ربت فوقه طيور
مرّ الهوى الصلف اجنحتها و رفّت

تروح منْه قلوب و تْلفّ و تْـدور
و تعود مهمـا عـنْه دارت و لفّت

الصدر بيت اغراب واللي ورى السور
نْفوس متعبها الحنين / و تعفّت

احبابي / يْروحون و يجون بـ الدور
واقف . و اشوف ازوالهم لين قفّت

فقدتهم و الدرب موحش و مهجور
حتى خطاويهم مع الريح سفّت

الراحلين اللي خَلَت عقبهم دور
اسمع صدى ضحكاتهم و اتلفّت

اللي ورى بسماتهم كان / مغمور
حتى ارتوت منه الكبود و تشفّت

ماعاد باقي نبض واحساس وشْعور
مرّوا على نبع الروافد و جفّت

مثل الظلام اللي رفع قيمة النور
لين لْبست وجهه قلوب / و تخفّت

عن كل خيبة ظن / طيّب و ماجور
الناس و الايام . كفّت و وفّت

الوقت يرفى جرح و يجبّر كسور
ضيقة صدر / و الحمد لله خفّت

سالم حمد الملعبي